ATƏT/DTİHB müşahidəçiləri 82 saylı İmişli-Saatlı Seçki Dairəsində hazırlıq prosesini izləyiblər
82 saylı İmişli-Saatlı Seçki Dairəsi sentyabrın 1-də Milli Məclisə keçiriləcək
seçkilərə hazırdır.
Bunu “Seçki 2024” Müstəqil Media Mərkəzinə açıqlamasında 82 saylı
İmişli-Saatlı Dairə Seçki Komissiyasının (DSK) sədri Barat Xəlilov deyib.
DSK sədri qeyd edib ki, dairə üzrə qeydiyyatda olan 48 min 929 seçici 50 seçki
məntəqəsində səsvermə hüququndan istifadə edəcək. Seçicilərdən 442 nəfəri ilk dəfə
səs verənlərdir. İki seçicinin 100-dən çox yaşı var.
“4 seçki məntəqəsində veb-kameralar quraşdırılıb. Əlilliyi olan seçicilərimizin
səsvermə prosesində iştirakı üçün də bütün şərait yaradılıb. Dairə üzrə seçkilərdə
9 namizəd mübarizə aparır. Hər bir namizədin təşviqat aparması üçün qanunun tələblərinə
uyğun addımlar atılıb. Bütün məntəqələrin ərazisində açıq və qapalı görüş yerləri
ayrılıb, o cümlədən, təşviqat lövhələri yerləşdirilib. Təşviqat kampaniyasında
heç bir neqativ hal qeydə alınmayıb. ATƏT-in Demokratik Təsisatlar və İnsan
Haqları Bürosunun (DTİHB) müşahidəçiləri də dairə üzrə seçkiyə hazırlıq
prosesini izləyiblər. Dairə üzrə səsvermə prosesini izləmək üçün 1000-dən çox
müşahidəçi qeydiyyatdan keçib”, - deyə o bildirib.
